CURSU D'ASTURIANU

La Xunta pola Defensa de la Llingua entama un cursu d'asturianu

LESNOTICIES.COM
Como ye vezu, la Xunta pola Defensa de la Llingua Asturiana pon clas d’asturianu un añu más. El cursu principia’l xueves 27 de xineru, nel local uviedín de la organización, el Llar Solidariu, na cai La Gascona 12, baxu A. El cursu tien 60 hores de duración onde los alumnos y alumnes van poder deprender el bon usu del idioma tanto a nivel escritu como oral.



L’horariu va ser de 19 a 21 hores, los martes y xueves. Sicasí, l'horariu va ser provisional hasta concretar cola xente matriculao. El preciu de la matrícula completa ye de 30 euros.



Les persones interesaes n’apuntase o garrar más información pueden facelo nel local de la Xunta, n’horariu de tarde, o nel chigre de la Xunta, La Casa Posafuelles (La Cuesta la Vega 10, Uviéu). Tamién pel corréu uvieu@exunta.org o llamando a los teléfonos 985 203 122 o 678 650 998 n'horariu de tardes.

LA TOPONIMIA DE XIXÓN

Llaboral enseña a los más pequeños a xugar cola toponimia de Xixón

 LES NOTICIES,30/01/2011

La Llaboral ufre a los más pequeños a lo llargo de tol semestre una actividá de baldre cada mes sobre los asuntos que se xestionen na Ciudá de la Cultura. Agora, los neños de 9 a 12 años van poder participar en Xugando cola Toponimia, una actividá entamada pola Oficina de la Llingua y el Conceyu de Xixón.

Esta ye una actividá pa que los escolinos conozan, con un rompecabeces xigante, les 26 parroquies del conceyu de Xixón. L'actividá supón una forma entretenida pal alumnáu de conocer la historia propia, monumentos y l'arquitectura de la ciudá de Xovellanos xugando y participando.

Los neños van principiar cola composición del rompecabeces al tiempu que van dir dándose esplicaciones etimolóxiques cencielles y dellos datos significativos sobre les parroquies del conceyu.

Amás, la Oficina Municipal de la Llingua editó una guía didáctica y un puzzle que-yos entreguen nel taller a tolos participantes y que ye un material pa trabayar depués na clas de Llingua Asturiana con actividaes y pasatiempos de tolos topónimos de Xixón.

LES NOTICIES,COM

NOTICIES

24/12/2010, ASTURNEWS.COM
L’Academia de la Llingua Asturiana espubliza la terminoloxía de la Física

Dientro del llabor d'anovamientu léxicu que se desendolca nel proyeutu Terminoloxía Asturiana (TERMAST) de l'Academia de la Llingua Asturiana, axúntase una nueva propuesta, dedicada esta vegada a la Terminoloxía de los conceutos básicos de la Física. El so autor ye Rubén Fernández Martínez, que yá tien asoleyáu dientro de Termast otru vocabulariu rellacionáu coles Matemátiques.

Nel presente trabayu axúntense al rodiu de 400 términos básicos del ámbitu científicu de la Física, col enfotu de que los llectores (estudiosos, especialistes o posible usuarios) amienten les correiciones que xulguen más afayadices. El tiempu dirá, nesti sen, qué propuestes acaben formando parte del corpus normativu de la llingua asturiana.

NOTICIES

La XDLA anuncia los ganadores de los Premios Andrés Solar

Les Noticies,13/12/2010

La Xunta pola Defensa la Llingua Asturiana (XDLA) acaba d'anunciar los ganadores de los Premios Andrés Solar na so XXVI edición. El Pegollu ye'l premiu a la entidá o persona que rescamplara nel últimu añu pol so llabor en defensa o promoción del asturianu: nesta edición foi pal trabayu del equipu del programa Camín de Cantares. El Madreñazu, el gallardón que reconoz a la persona o entidá que destacara pol so llabor negativu pa cola llingua asturiana: el premiu foi pa Herminio Sastre, conseyeru d’Educación y Ciencia del Principáu d’Asturies.

La Xunta quier reconocer col Pegollu'l trabayu de tol equipu que fai posible’l programa Camín de Cantares.

Les Noticies,13/12/2010

NOTICIES

L'asturianu vuelve a tar considerao pola Unesco como una llingua en peligru

Fecha: 09/12/2010, LES NOTICIES.COM

L'asturianu vuelve a aparecer otru añu más como una de llingües en peligru d'estinción nel nuevu Atles de les Llingües del Mundu en Peligru, que publica la Organización de les Naciones Uníes pa la Educación, la Ciencia y la Cultura (Unesco). Ente les otres llingües del Estáu español en peligru, l'Atles tamién cita al vascu, al aragonés y al aranés. Nin el gallegu nin el catalán tán incluíos nesta clasificación.

L'atles compónse d'una llista de 2.473 llingües en riesgu de desaparecer. L'estudiu establez cinco graos de riesgu pa una llingua: vulnerable, na que los neños falen l'idioma, que pue tar restrinxíu a ámbitos de la casa; definitivamente en peligru: los menores nun deprienden l'idioma como llingua materna; gravemente en peligru: falen los güelos, los padres entienden y los neños non; críticamente en peligru: los güelos son los falantes más mozos; y estinta, ensin falantes dende 1950. La llingua asturiana ta situada nel segundu nivel más baxo de peligru.

LES NOTICIES.COM